“Балалы солянка”га рәхим итегез!

31 гыйнвар көнне “УНИКС”та “Балалы солянка” концерты булачак. Бер сәхнәдә танылган җырчылар белән бергә аларның балалары чыгыш ясый – бу искиткеч гүзәл тамаша булыр дип көтелә. Ә кайбер җырчыларның оныклары да булачак әле. Мисал өчен, Хәния Фәрхи “Балалы солянка” концертында беренче тапкыр чыгыш ясаячак. Аный “Әйдә бие” диген җыры барышында сәхнәдәгә “Дорога из городо” бию төркеме белән бергә әйдәп оныгы Әминә бииячәк. Әминәне әбисе талантлы, сыгылмалы дип мактый.

- Әминәне бик сирәк күрәм, шулкадәр сагынып күрешәбез. Әле менә Яңа ел бәйрәмнәреннән соң туганнарның балалары белән бергә җыелышып рәхәтләнеп күңел ачтык. Балаларны ресторанга алып кердем. Алар анда безгә концерт куйдылар. Әминә белән бергә иҗат иткәнебез бар дип әйтүем (елмая). “Баламның баласы” җырының клибында да төште бит ул. Шуңа хәзер Әминә белән зур сәхнәгә чыгуыма шатмын, - дип уртаклашып алды Хәния ханым.

Татарстанның атказанган артисты Рөстәм Асаев кызы Гөлназ Асаева белән дуэт башкарачак. Гөлназның инде Татарстанда да, Башкорстанда да үз тыңлаучысы бар. Ул тиздән профессиональ җырчы булачак. Моңлы гаиләдә тәрбияләнгән бала ничек җырламасын инде?

- “Балалы солянка” концертында әтием белән “Кышкы романс” җырын башкарачакбыз. Әле икебез бергә сәхнәдә дуэт буларак беренче тапкыр гына чыгыш ясыйбыз. Һәр чыгыш алдыннан дулкынлану хисе була, дип уйлыйм. Икебез дә дулкынланабыз. “Кышкы романстан соң, бәлки, Ходай кушса, киләчәктә дә дуэтлар яздырырбыз әле , - дип уртаклашты Гөлназ.

Ә менә Альбина Апанаева үзе белән бергә сәхнәгә яшь тә сигез айлык кызы Миралияне алып чыгачак. Алар бергәләп “Син минем матур кызым” җырына биерләр. Альбина баласы теле белән әйтмешли: “Топ-топ” итәрләр.

- Кызымның инде хәзер үк талантлы булуы күренә. Күптәннән музыка тавышын ишетеп бии инде ул. “Син минем матур кызым” җыры әле әзер түгел, бары аранжировкасы гына бар иде. Шуны телефоннан җибәргәч, музыкасына үрмәләп китте ул безнең.

“Балалы солянка” сәхнәсендә тагын Гүзәл Уразова, Илназ Баһ, “Зө-Ләй-Лә”, Булат Нигъмәтуллин, Закир Шаһбан, Илдар Әхмәтов, Гөлдания Хәйруллина, Равил Галиев, Иркә һәм башка бик күп артистлар чыгыш ясаячак. Бу концертны күрми калырга ярамый.

Димәк, 31 гыйнвар, 17:00 сәгатьтә “УНИКС”та очрашканга кадәр. Белешмәләр өчен телефон: 297-43-77.

Билетларны түбәндәге уыннарда сатып алырга мөмкин:

Белешмәләр өчен тел.: 2 97 43 77.

УНИКС кассасы тел.: (843) 292-70-06.

KASSIR.RU (843) 512-25-35 һәм

CONCERT.RU (240-84-84) сайтларында заказ бирергә мөмкин.