Иртәгәгә калдырмыйк!

Даими рәвештә эчүе аркасында хатыны, балалары ташлап киткән бер бәндә, ниһаять, эчүен ташларга уйлаган һәм кухнясының диварына «Иртәгәдән эчүне ташлыйм!» дигән шигарь язып куйган. Әлбәттә, ул бу көнне янәдән лыкынганчы эчкән. Икенче көнне махмырдан торып эшенә барып кайткан. Кайткач, карый: кухняда теге шигарь эленеп тора. Әһә, дигән бу, бүген эчәм дә, иртәгә бер грамм капты юк. Әмма икенче кичтә янә эчкән, чөнки ул язып элгән шигарьдә иртәгә дип язылган ич. Шулай итеп, мескен бәндә эчүен ташлый алмыйча үлеп киткән.

Без дә шул алкаш кебек күп кенә эшлә-ребезне иртәгә калдырырга гадәтләнгәнбез. Үз сәламәтлегебез хакында уйлаганда бигрәк тә. Иртәгәдән иртәнге күнекмә (зарядка) ясый башлыйм, яисә чаңгыга басам дип уйлыйбыз да, әлеге вәгъдәләребез гел иртәгәгә кала-кала, еллар узып китә. Ә инде билләр бөгелми, аяклар авырта башлагач инде соң була. Хәзерге икешәр атнага сузылган Яңа ел каникулы да безне күп ашаудан (әлбәттә, эчүдән дә), аз хәрәкәтләнүдән коткара алмый. Чаңгы белән шәһәр читенә чыгарга, саф һавада йөрергә берәү дә комачауламый югыйсә. Ә без бүселгәнче ашап, телевизордан сериаллар карап ятуны кулайрак күрәбез. Авылда яшәүчеләр ичмасам хәрәкәтләнә әле: карын көри, малларын карый, суын ташый дигәндәй. Шәһәрдәгеләргә спорт белән шөгыльләнү өчен мөмкинлекләр күбрәк булса да (менә дигән спорт комплекслары, йөзү бассейннары эшләп тора, үзеңдә булмаса, чаңгы, тимераякны прокат пунктларыннан алып торырга мөмкин), түшәмгә төкереп ята бирәләр.