22.12.2014 Җәмгыять

Алай-болай була калса, һөнәрегез бармы? (Сораштыру)

Татарстанның күп кенә оешмалары яңа елдан хезмәткәрләр сафын сирәгәйтмәкче. Sntat.ru порталыннан алынган мәгълүматларга караганда, агымдагы елда республиканың мәшгульлек үзәкләренә 9,8 мең хезмәткәрне “кыскарту” турында мәгълүмат тапшырылган. Хәзерге вакытта шуларның 7,5 меңе эшеннән азат ителгән. Узган ел кыскартулар саны азрак булган.

Россия күләмендә уздырылган сораштыру да кешеләрнең 17 процентының киләсе ике-өч айда эшсез калырмын дип куркуын күрсәтә. Сораштыруда катнашучыларның 24 проценты, туганнарым арасында хезмәт хакын ала алмыйча йөрүчеләр бар, дип җаваплаган. Экспертлар, яңа һөнәрләр үзләштерергә кирәк, ди. Ә сез эшсез калырмын дип куркасызмы? Башка һөнәрегез бармы?

Марат БИКМУЛЛИН, эшмәкәр:

– Әле икътисадый кризис булмаган вакытта да безнең штат зур түгел иде. Бюджет өлкәсендә коллективлар зур, чынлап эшләүчеләр, хезмәтен сыйфатлы башкаручылар аз. Бездә эшләүчеләр төрлесен эшли белә, төрле һөнәргә ия. Кыскарту түгел, киресенчә, яңа талантлы кешеләрне эшкә җәлеп итү процессы бара. Минем электр яктырткычлар җитештерү бизнесым да бар. Менә Кытай белән көндәшлеккә чыдый алырбызмы, юкмы?! Әмма тырышасы иде. Бәяләр кыйммәтләнгәндә без ясаганны арзанракка сатарга телибез. Үземә килгәндә, төрлесен эшли беләм, балаларны да кеше авызына карап утырмасыннар дип, төрлесенә өйрәтәбез. Эшкә өйрәнеп үссеннәр.

Равия СӘЙФУЛЛИНА, талкыш кәләвә җитештерүче:

– Без зур оешма түгел, кул астымда эшләүче кәләвәчеләр – алтынга тиң осталар. Миңа аларның һәрберсе кадерле, ярты ел дәвамында өйрәнү узалар, шуңа күрә кыскартмаска тырышачакмын. Әлбәттә, нишләп бетәрбез дип миндә дә курку бар. Осталар да борчыла. Әле тегендә, әле монда кыскартулар бара дип ишетәм. Без хезмәт хакы белән дә, Аллага шөкер, вакытында хисаплашабыз. Халык та, кунакка барса да, бәйрәм табынына да, без ясаган кәләвәне сатып алыр дип ышанам. Татарның “Рафаэлло”сы дим мин аны. Халык безне ташламас, сыйфатлы ризык сатып алыр дип өметләнәм. Бәяләрне дә арттырмадык.

Гамил Нур, тамада:

– Эшсезлектән курыкмыйм. Аяк-кул исән булганда, бертуктаусыз эшли алам. Аз чыгымлы, тыйнак кеше мин. Һөнәрләрем дә җитәрлек: хет мал чалучы, пешекче, урам себерүче була алам. Эшнең начары юк, кайберәүләр кебек чирканмыйм, хурланмыйм. Дәүләт хезмәткәрләренә бераз авыр булачак, соңгы елларда арткан хезмәт хаклары кыйммәтен югалта. Нефть югары бәядән сатылганда, сугыш булмаганда рәхәт яшәдек. Түрәгә дә, пенсионерга да, эш атына да, каракка да җитте. Хәзер барысына да 1990 еллардагы кебек, минималь акчага яшәүне искә төшерергә туры киләчәк.

Айдар Хәев, Чаллының 3нче номерлы балалар поликлиникасы баш табибы:

– Мәскәүдә дә, Уфада да табиблар кыскартуга каршы урам җыеннары уздыра. Ә бездә барысы да тыныч. Хезмәткәрләрне кыскарту планы юк, Татарстан Сәламәтлек саклау министрлыгыннан да андый директива булмады. Минем учреждениедә, киресенчә, кешеләр җитешми. Эшсез калам дип үзем дә борчылмыйм, хезмәттәшләремдә дә борчылу юк.

Ватаным Татарстан
№ 196 | 20.12.2014