Безгә Хэллоуин кирәкме? (Сораштыру)

 

– Һәр бәйрәм нинди дә булса традицияләргә ни­гез­ләнә, йә булмаса  дәүләт тарафыннан билгеләнә. Хэл­лоу­инда исә мөселман­нар­ның да, православие дине вә­килләренең дә тра­диция­ләре сизелми. Ул дәүләт бәй­рәме дә, безнең җирлек­тә бар­лыкка килгән тарихи бәй­рәм дә түгел. Шуңа күрә бездә Хэллоуинны билгеләп узуны кирәк тапмыйм.

 

 

– Мин бу бәйрәмгә каршы. Үз традицияләребез бе­лән бәйле, безгә бик якын бул­ган милли бәй­рәм­нәре­без бар. Дөнья күләмендә бил­геләп уздырылган Хэллоуин кебек бәйрәм ярдә­мендә без үзебезгә хас булмаган ниндидер яңа мә­дә­ният кер­тергә җыенабыз. Бу ниндидер җыелма, ясалма субкультуралар барлыкка ки­тер­мәсме икән дигән шик бар. Яшьләр дә үзебезнең бәй­рәмнәрдән ләззәт тапмыйча, читтән кергән­нә­ре­нә өстен­лек бирә бит.

 

 

– Кемнеңдер юньсез бәй­­рәме булган Хэллоуин­ның бездә бәйрәм ите­лүенә каршы мин. Үзе­безнең милли бәй­рәмнәргә җитми инде. Яшь­ләр дә, җен-пәри булып киенеп, әл­лә нинди мәгънәсез чараларда кү­ңел ачып йөргәнче, күбрәк үзе­безнең бәйрәм­нәрне бил­геләп узсыннар иде.

 

 

– Дин, гомумән, сихерче, албасты, шайтан, җен-пә­ри­ләргә каршы. Бер яктан караганда, Хэллоуин сихерчелек белән дә шө­гыльләнү түгел, ул  чын җен-пәри­ләр­не дә җыеп ятмый. Тик әлеге тискәре затларга атап уз­дырылган бу бәйрәм, тора-ба­ра сихерче, җен-пәри­ләрнең тормышыбызда популярлашып китеп, кеше­ләрнең аларга уңай карый башлавына ки­терергә мөм­кин. Шуңа күрә дин бу бәй­рәмгә каршы. Тагын бер әйбергә игътибар ит­кәнем бар. Арча районы Яңа Кырлай авылында урнашкан Кыш бабай рези­денция­сен­дә ел саен балалар өчен бәй­рәм тамашалары оештырыла. Анда Кыш бабай­ның дуслары арасында шайтан да бар. Димәк, шайтан кешенең дә дусты булып чыга. Мондый чараларны оештырганда ру­хи кыйм­мәтләргә дә игътибар итсеннәр иде.

 

 

– Хэллоуин – кеше аптыраганлыктан уйлап табылган әйбер ул. Җен-пә­ри­ләр­не Тукай да, Мөхәм­мәд пәй­гамбәр дә сүккән. Ул – ке­ше­не азындыру, котырту дигән сүз. Дөнья болай да тыныч тү­гел. Шуңа өстәп тагын ниндидер шаукымнар да кү­зәтелә. Хэллоуин да шу­лар­ның берсе. Шул шаукым бе­лән яшь­ләргә конфет дип нар­котигын да таратырга мөм­­киннәр. Бу бәй­рәм, га­дәт­тә, эчүгә корылган була. Аек кеше алай акылдан язган сыман юләр­ләнеп йөри алмый. Хэллоуин психиканы да боза. Ниндидер җен-пә­ридән түгел, Хо­дайдан, ата-ана сүзеннән куркырга ки­рәк. Әлеге чараны оештыручыларны штраф­ка тарта баш­ласыннар иде.

 

 

– Миңа төрле илләрнең, халыкларның бәйрәмнәре кызык. Алар аркылы мил­ләт һәм аларның гореф-гадәт­ләре белән якыннан таны­шасың. Әйтик, Хэллоуин бәй­­рәмендә без инг­лизчә ге­нә сөйләшәбез. Чит мәдә­ният үрнәге булса да, аңа татарча эчтәлек тә кертергә мөмкин. Мәсәлән, шул ук кабакны татар егете яки Шү­рәлегә охшатып ясап була. Кызык бит!