“Һөнәр” фестивале һәм Камал театры драматургия конкурсы игълан итә

“Һөнәр” фестивале беркайчан да спектакльләр күрсәтү белән генә чикләнмәде. Һәр ел саен “Һөнәр” кысаларында режиссура лабораториясе оештырыла һәм тәнкыйтьчеләр катнашында фикер алышулар үткәрелеп килә.

 

Быел беренче тапкыр “Һөнәр” VI Бөтенроссия яшь татар режиссурасы фестивале кысаларында 15-21 декабрьдә драматургия лабораториясе булачак. Аның максаты – драматург булырга теләүче талантларны барлау. Режиссер һәм актерлар ярдәме белән аларны драматургиянең асылына төшендерү.

 

Лабораториядә теләгән һәркем катнаша ала. Моның өчен фестивальне оештыручыларга булачак пьесаның синопсисын гына җибәрергә кирәк.

 

Синопсис – ул пьесадагы төп вакыйгаларны атап чыгу, кыскача эчтәлек.

 

Нияз Игъламов: "Нәрсә соң ул синопсис? Ул син ачарга теләгән нинди дә булса вакыйганың кыскача эчтәлеге. Мәрьям Тәлгатьне ярата, тик күрше егете Рәмзил аларның өйләнешүләренә каршы... Аның ире командировкадан кайтты һәм... Сугыш кинәт башланды һәм кинәт тәмамланды да, авылларда балалар тумый башлады, кырда тургай тавышы тынды... Кешегә хакимлек бирелгән, тик ул җаваплылыктан качарга тели... Авыл малае Марат, агрономлыкка укырга дип, шәһәргә килә һәм ялланулы үтерүчегә әверелә… Альфа-Центаврда яшәүчеләр җир халкы белән үз тәҗрибәләрен уртаклашырга телиләр, ләкин Q планетасыннан килгән килмешәкләр дөньяны яулап алмакчылар... Шүрәле ялгызы гына тынычлап яшәргә тели, әмма аңа үсеп килүче шәһәр шаукымы комачаулый... һ.б. Нәрсә хакында булса да ярый. Теләсә нинди сюжет. Теләсә-нинди тарих. Вакыйгаларнын төрлечә ачарга мөмкин..."

 

Сайланып алынган синопсис режиссерлар, актерлар һәм драматургия лабораториясендәге башка катнашучылар белән бергәләп камилләштереләчәк, детальләр белән баетылачак. Драматургия лабораториясе иҗат ителгән яңа пьесаларны уку белән тәмамланачак. Иң яхшы пьесалар сәхнәдә куелып һәм басылып чыгачак.

 

Синопсисны 2014 елның 13 ноябренә кадәр kamalteatr@mail.ru адресына җибәрергә, хатның исемен “Синопсис. Һөнәр” дип куярга. Катнашучыларның яше мөһим түгел. Төп шарт – синопсис татар телендә булырга тиеш.

 

“Һөнәр” VI Бөтенроссия яшь татар режиссурасы фестивале 15-21 декабрьдә Казанда үтә. Быел фестивальдә Әлмәт, Казан, Яр Чаллы һәм Туймазы шәһәрләреннән режиссерлар катнаша. “Һөнәр” афишасында барлыгы рус һәм татар телләрендә 10 спектакль һәм 4 эскиз эш тәкъдим ителә.