|
|
Бүген кемнәр туган
|
|
Архив
|
26.10.2014 Мәдәният
«Минем исемем Кызыл»га музыканы илкүләм танылган композитор Сергей Жуков язганГ.Камал исемендәге Татар дәүләт Академия театрының “Минем исемем Кызыл” премьерасына музыканы Россиянең танылган композиторы Сергей Жуков иҗат итте. Искәртеп үтәбез, “Нобель премиясе” лауреаты, төрек авторы Орхан Памукның легендар романы буенча спектакльнең премьерасы 7 ноябрьдә 19.00 сәгатьтә театрның зур сәхнәсендә була. Сергей Жуков – Мәскәүдә яшәп иҗат итүче композитор, Россиянең атказанган сәнгать эшлеклесе, Россиянең композиторлар берлеге әгъзасы – режиссер Максим Кальсин белән берлектә беренче мәртәбә эшли. Композитор бу спектакль өчен махсус 12 музыкаль тема иҗат итте. «Башта без күрешеп бик озаклап сөйләштек. Сергей Викторович романны укып чыкты. Бу әсәр аңа нык тәэсир иткән. Җәй көне мин аның янына Мәскәүгә янәдән бардым һәм озак әзерлектән соң гына ул спектакльгә музыка язарга кереште. Ул иҗат иткән әлеге музыка искиткеч. Һәр персонажның үз лейтмотивы, үз музыкаль темасы», - дип сөйли Максим Кальсин.
Сергей Жуковның яздырылган музыкаль әсәрләреннән кала, спектакльдә тере музыка да яңгыраячак. Композитор сайлап алган профессиональ музыкантлар милли уен коралларында уйнаячак: саз, кеманча, бәрмә кораллар.
«Сәхнәдә музыкантлар Жуков музыкасын һәм, шулай ук, импровизация ясап та уйнаячаклар. Спектакльдә милли уен кораллары арасында көнчыгыш музыкасы рухына якын торган гобой уен коралының яңгыравы, миңа калса, аеруча да кызыклы», - ди спектакльнең режиссеры.
Искәртеп үтәбез, “Минем исемем Кызыл” спектакленең премьерасы 7 ноябрьдә 19.00 сәгатьтә Г.Камал исемендәге Татар дәүләт Академия театрының зур сәхнәсендә. Бу - күренекле заман язучысы Орхан Памук романының Россиядә, ә бәлки, бөтен дөньяда спектакль буларак беренче мәртәбә куелышы. Спектакльнең режиссеры – Магнитогорск драма театрының баш режиссеры, легендар режиссер Кама Гинкасның укучысы Максим Кальсин. Спектакльдә труппаның әйдәп баручы артистлары катнаша: Илдус Габдрахманов, Радик Бариев, Әзһәр Шакиров, Алсу Гайнуллина, Айдар Хафизов, Нәфисә Хәйруллина һ.б.
Белешмә:
Сергей Жуков 1951 елны туа. Житомир музыкаль училищесын тәмамлый. 1978 елда Мәскәү Дәүләт консерваториясенең композиция классын, ә 1980 елны – ассистентура-стажировкасын тәмамлый.
Композитор иҗатының үзенчәлеге –барлык жанрларда да эшли алуында. Аның сәнгать багажында балетлар, симфонияләр, концертлар, кантаталар, оратория, мюзикл, камера музыкасы, вокал музыкасы, хор өчен язылган әсәрләр, театр һәм кино өчен иҗат ителгән музыка, мультимедия проектлар, балалар өчен музыка.
СССР Композиторлар берлеге әгъзасы (1980), РФнең Атказанган сәнгать эшлеклесе (2007).
|
Иң күп укылган
|