Ел саен ул гаиләсе белән туган ягы Арча районының Урта Пошалым авылына кайтып, 20 сотый җиргә бәрәңге чәчә икән. Бер әңгәмәсендә ул: “Эшмәкәрлек белән шөгыльләнмим. Авылдан үзебез утырткан бәрәңгене сатудан башка”, - дип шаяртып алган иде хәтта.
Бәрәңге утырту канга сеңгән инде. Авыл баласы бит без. Ел саен Урта Пошалымга кайтып бәрәңге утыртабыз. Бүгенге көндә әнием Разыя гына исән. Әтием Раиф вафат инде. Бәрәңгенең бар эшен дә Люция белән авылга кайтып эшлибез. Балалар да булышкалый. Матыйклау эшләрен үзебез, ә утырту-алу эшләренә трактор ярдәмгә килә. Бәрәңге уңышлы чыкканда күңелле, әлбәттә. Бүгенгедәй хәтерлим: 1983 елны 9 капчык бәрәңге утыртып, 7 капчык бәрәңге алган идек. Кызганыч, әлбәттә. Минем бөтен җырларым да, клипларым да авыл темасына багышланган. Авылдан мин берничек тә аерыла алмыйм. “Тәгәрәткән бәрәңге” җырыма төшерелгән клип та авыл темасына. Җырчы, клипмейкер Алмаз Нургалиев җитәкчелегендә төшерелде ул. Сценариесен икәү бергә уйладык. Башкаларны яманлап әйтәсем килми. Авыл баласы булгангадыр инде, мин авылдан, аның тормышыннан ерак китә алмыйм, - дип сөйләде җырчы Рөстәм Закиров.
Ел саен бәрәңге алып бетергәннән соң, гаиләсе белән бәрәңге тәгәрәтеп ашыйлар. Гармунда авыл көйләрен сузып, җырлап та алалар. Рөстәм әфәнде бәрәңге кушып пешерелгән ризыкларга да тукталып китте. Алар ягы Арчада күбрәк өчпочмак пешерсәләр, Люция ханымның ягы Лениногорскида табынга бәлеш чыгаралар икән. “Бер үк ингредиентлар, шул ук ит, шул ук бәрәңге дигәндәй. Әмма өчпочмакның - бертөрле, ә бәлешнең тәме бөтенләй икенче була. Бәлешне бит инде табада булган килеш ачасың да, бер гаилә булып ашыйсың. Ә өчпочмакны һәрбер кеше аерым-аерым тотып ашый. Аерым бер кеше булып кына кала. Ә бәлеш булганда тулаем бер гаилә. Гаилә булганда тәрбияви яктан бәлеш әзерләп табынга чыгаруы күңелле дип саныйм”, - дип шул ягын да әйтеп узды Рөстәм әфәнде.
Әйтергә кирәк, быел җырчы Рөстәм Закиров Татарстанның халык артисты исемен алды. Профессиональ сәхнәдә 21 ел иҗат итеп килгән җырчы әлеге шатлыгын уртаклашу нияте белән барлык укытучыларын, якташларын, дусларын, иганәчеләрен, якыннарын ресторанга чакырган булган. Әтиләренең уңышлары өчен 7 нче сыйныфта укучы улы Айрат белән 3 нче сыйныфта укучы кызы Миләүшә дә сөенгән. Люция ханымны әйтеп тә торасы юк. Ул чын мәгънәсендә аның киңәшчесе дә, ярдәмчесе дә.
Җырчы гаилә матур көннәр булып бу атнаның ялларында Урта Пошалымга бәрәңге алырга кайтырга җыенып тора. Әле күптән түгел генә Рөстәм әфәнде бәрәңгенең сабакларын чабып килгән. Бәрәңгене исән-сау алып килгәннән соң, җырчы пар җиң сызганып дуэт концертларына әзерләнмәкче. Быелгы программага, Бөек Җиңүнең 70 еллыгы якынлашу сәбәпле, шул темадагы җырлар кертелгән. Менә шулай икән ул! Тырыш кеше шәһәргә дә, авылга да өлгерә.