«ТЕТРИС»

Төньяк Америка һәм Көнбатыш Европа илләре югары технологияләр өлкәсендә, һичшиксез, Россиядән бер башка югары тора. Әмма шунысы хак: дөньяның иң популяр компьютер уеннарының берсен рус кешесе уйлап чыгарган. Бу уенны сез дә яхшы беләсездер, ул — «Тетрис». Аны хәтта компьютер белән мавыкмаган кешеләр дә белә булса кирәк.

Пенал хәтле «Тетрис» тартмасын хәзер адым саен саталар. Бу бездә генә түгел, бөтен дөньяда шулай. Иң кызыгы шунда: уенны уйлап чыгарган Мәскәү математигы Алексей Пажитнов бу хезмәте өчен бер тиен дә акча күрмәгән. Алга киткән чит илдә булса, ул миллионерга әйләнгән булыр иде инде. Дөрес, Пажитнов бүгенге көндә шәп акча эшли торгандыр. Ул эшләгән «Аниматек» компаниясе «Microsoft» фирмасы өчен югары сыйфатлы компьютер уеннары уйлап чыгара. «Microsoft» — компьютер дөньясында иң эре фирма.

 «Тетрис» сүзе чит телдән тәрҗемә иткәндә «дүртле» дигәнне аңлата. Игътибар итсәгез, уенның һәр формасы дүрт шакмактан тора. Дөрес, хәзер инде «Тетрис»ның меңләгән төре бар. Алай гына да түгел, аның принцибы хәзер бик күп башка уеннарда да файдаланыла. Әмма гади «Тетрис» — алыштыргысыз. Белгечләр әйтүенчә, аның феномены да шунда — гадилектә. 7 төрле форманы буш урыннар калдырмыйча тезеп менәсе. Шул гына.

«Тетрис» — ял итү һәм вакыт үткәрү өчен генә эшләнгән уен түгел. Ул кешенең мантыйкый фикерләвен һәм уйлау тизлеген үстерә.