СМАРТФОН

Смартфон — зур экранлы, фотокамералы, тагын әллә ниләре булган кәрәзле телефон аппараты гына түгел әле ул! Смартфон — компьютерлар дөньсында урнашкан принципларга нигезләнеп корылган программ тәэминатлы телефон. Белгәнегезчә, гади кәрәзле телефон аппаратында бары бер генә программа бар: ул шалтырата, телефон кенәгәсе һәм хәбәрләр белән эшли, шалтыратулар исемлеген алып бара, саклый, интернетка керергә мөмкинлек бирә, уеннар тәкъдим итә һ. б. Ә смартфонның вазифалары ачык архитектуралы. Бу — вазифаларның стандарт, ягъни кабул ителгән җыелмасын үзгәртеп була, һәм алар телефон җитештерүчеләр тарафыннан да, бөтенләй чит кешеләр тарафыннан да күпкә киңәйтелергә мөмкин дигән сүз.

Телефоннарның бу төренең төзелешендәге төп операцион системалар барлык ресурсларны да: хәтерне, файл системасын, экранны, камераны, радиотюнерны, чыбыксыз элемтә модулен файдаланырга мөмкинлек бирә. Смартфонның вазифалары җитештерүче «тегеп» куйган программ тәэминат белән генә чикләнми. Сиңа кайсы вазифалар кирәген үзең сайлыйсың да кирәкле программаны билгелисең.

Җитештерүче операцион системаны күзәтеп тора, вакыт-вакыт яңа телефоннар чыгара, ә калганнарын файдаланучы үзе урнаштыра. Шунысы бар: операцион системаларның берничә төре бар, һәм алар бер-берсенә туры килми. Әле ул гына да түгел, бер үк операцион система белән эшләүче смартфоннар бер-берсе белән дә ярашмаска мөмкин. Шуңа күрә җитештерүчеләр телефоннарның бу төрен санлы техника белән кызыксынучы һәм үзенчәлекле фикер йөртүче кулланучыларга тәкъдим итәләр, алар ярашлылык мәсьәләләрен үзләре җиңеп чыгар дип ышаналар.

Җитешсезлекләре булса да, смартфон сатып алырга теләүчеләр җитәрлек. Шулай булмый ни, бер кечкенә генә җайланмада диктофон, MP 3 плеер, модем, ИК-порт, Bluetooth, Fm-радиоалгыч, видеокамера булсын әле!

Теләсәң, смартфон ярдәмендә китап укырга да була: экран үлчәмнәре, заманча модельләрнең көче текстны бернинди комачауларсыз укырга мөмкинлек бирә. Программаларның күбесе текстны юлдан юлга күчерә, шрифт үлчәмен үзгәртә, текстның биттәге юнәлешен үзгәртә һәм тагын әллә ниләр эшли ала. Бер сүз белән әйткәндә, тотып эшләп караган кеше, яңадан бу җайланманы кулланудан тыелып тора алмаячак!