СӨЛӘЙМАНОВ ӘНВӘР

Әнвәр Сөләймановның“Җирдәге йолдызлар” исемле җыентыгын тәкъдим иттеләр

(Уфа, 16 март, “Татар-информ”, Фәнис Фәтхуллин). Бүген Уфада, Зәки Вәлиди исемендәге Милли китапханәдә Башкортстандагы танылган татар журналисты Әнвәр Сөләймановның чираттагы китабының исем туе булып үтте. Авторның “Җирдәге йолдызлар” исемле җыентыгын тәкъдим итү чарасына бик күп әдәбият сөючеләр, Уфадагы югары уку йортларының татар һәм башкорт бүлекләрендә белем алучы талиплар килде.

Башкортстанның Бишбүләк районында яшәүче талантлы татар журналисты Әнвәр Сөләйманов тормышында күптән түгел ике истәлекле вакыйга булган иде. Беренчедән, Башкортстанның Зәйнәп Биишева исемендәге “Китап” дәүләт нәшриятында аның “Җирдәге йолдызлар” исемле чираттагы китабы басылып чыкты. Икенчедән, Татарстан президенты Уфага эш сәфәренә килгәч, аңа “Татарстан Республикасының атказанган мәдәният хезмәткәре” дигән мактаулы исем билгеләрен тапшырды.

Бүген Зәки Вәлиди исемендәге Милли китапханәдә исем туе үткән җыентыкка авторның Башкортстанда һәм Татарстанда яшәүче милләттәшләребез хакында язылган очеркалары, сурәтләмәләре һәм әңгәмәләре урын алган. Җәмгысе 57 атаклы шәхес турында бай мәгълүматлар алып була бу китаптан.

“Җирдәге йолдызлар” җыентыгына кереш сүзне республикадагы танылган татар журналисты, күп кенә мактаулы исемнәр һәм бүләкләр иясе, “Кызыл таң” татар газетасы баш мөхәррире урынбасары Фәрит Фәткуллин язган. Җыентык үзе бик матур итеп, югары зәвык белән бизәлгән. Китап башкорт телендә басылган. Әнвәр Сөләйманов Бишбүләк районы егете. Башкортстан дәүләт университетын тәмамлаганнан соң, гомерен журналистикага багышлый - башта туган районында, аннан соң Уфада, республика матбугат басмаларында хезмәт итә. Бүгенге көндә тагын туган ягында яшәп иҗат итә оста каләм әһеле. Әле ул Уфада тәкъдим ителгән китабының икенче өлеше булачагын да әйтте. Очрашу барышында Әнвәр Сөләйманов әдәбият сөючеләрнең һәм талипларның күпсанлы сорауларына җаваплар бирде. Матур кичәне сәнгать осталары үзләренең күңелле җыр-моңнары белән дә бизәде.