ХӘРБИ ДӨЛФӘТ

Дөлфәт Хәрби (Хафизов Дөлфәт Юныс улы) 1941 елның 1 апрелендә Мөслим районының Карл Либкнехт исемендәге авылында туа. Туган авылында башлангыч, Күбәктә урта белем ала. 1963 елда Калининград хәрби-инженерлык училищесын, 1972 һәм 1981 елларда Мәскәүдә ике хәрби академия тәмамлый. 1966 елның 6 декабрендә Билгесез солдат кабере янында беренче салют бирү белән командалык итә. 30 елга якын армия хезмәтендә була, Чернобыль афәтенә юлыккан кешеләрне коткаруда сәламәтлеген аямыйча катнаша һәм нәтиҗәдә үзе инвалид булып кала.

Шундый авыр тормыш юлы узуга да карамастан, Дөлфәт ага тормышка һәм кешеләргә ышанычын һәм мәхәббәтен җуймаган. Ачы киная белән сугарылган такмаклары, җылы юмор белән үрелгән фәлсәфи-лирик шигырьләре аның киң эрудицияле һәм көчле рухлы шәхес булуы турында сөйлиләр. Дөлфәт Хәрбинең беренче шигырьләре 1959 елда Мөслим районының “Колхоз байрагы” газетасында күренә башлый. Республика матбугатында, бигрәк тә Чаллы шәһәрендә чыгучы газеталарда һәм журналларда аның әсәрләре әледән-әле чыгып килә. 1986 елда нәшер ителгән “Тәрәзәңә чиртер мизгел” дип аталган күмәк җыентык авторларының берсе – ул. Аның шигырьләре һәм проза әсәрләре аерым китаплар булып та чыкты. Соңгы вакытта күп кенә композиторлар аның шигырьләренә көйләр дә яздылар.