ХАНОВА АЙГӨЛ

Айгөл Ханованың "Мәдәни җомга" редакциясендә эшли башлавына "Җирән Чичән белән Карачәч сылу" булышты бугай. Мин аңардан шул спектакльнең премьерасы хакында язма әзерләп китерүен сораган идем һәм менә — билгеләнгән көнне Айгөл минем эш бүлмәсе ишеген шакыды.

— Газинур абый, сезнең җөмләләрне яңабаштан төзәтеп язучы аяусыз мөхәррир булуыгызны беләм. Тик шулай да, алай ук усал кыланмасагыз иде.., - диде ул язмасы өчен алдан ук гафу үтенгәндәй.

Ләкин, шөкер, аңа кызарырга туры килмәде. Төзек, тыгыз җөмләләр белән бәян кылынган текст, үзгәртелмичә, ничек бар шулай, гәзитнең чираттагы санына кереп китте. Шул рәвешле, Айгөлебездә сәнгать бүлеге мөдире булып эшли башлады. Гәзитебездә тормыш тәҗрибәсен шактый тупларга өлгергән, азау ярган өлкән журналистлар, шагыйрьләр эшләвен исәпкә алганда, югары уку йортын тәмамлап әле бер-ике елын гына матбугат эшенә багышлаган яшь кыз өчен бу, әлбәттә, зур җиңү иде. Айгөл моны үзе дә аңлап, үзенә тапшырылган мәшәкатьле, авыр йөкне җаваплылык хисе тоеп тартты. Гәзитебез сәхифәләрендә театр, җыр, рәсем сәнгате хакында тулыканлы язмалар, олпат сәнгать-кярләр һәм яшь артистлар, рәссамнар белән кызыклы әңгәмәләр еш басылды. Болардан тыш, мин Айгөлнең күңел җылысы белән иҗат ителгән матур-матур хикәяләре барлыгын да беләм. Әдәбият дөньясына аяк басарга теләвеңне хуплыйм, сеңелкәш! Хәерле сәгатьтә булсын.

Газинур абыең Морат.