ГАЛИДӘН ХАКИМ

1944 нче елның 24 июлендә, Самар өлкәсенең Гали авылында туып-үстем. Авылым мәктәбендә җиде ел укыганнан соң, яшүсмер килеш авыл агайларына ияреп, берничә ел гомеремне Ырынбур якларында шабашкыда йөреп уздырдым. Үземне белә-белгәннән бирле рәсем ясау белән мавыкканга, 1961 нче елны, Похвистнево райком комсомолы тәкъдиме белән, Татарстанның Лениногорск шәһәрендә яңа ачылган музыка һәм художество училищесына килеп, рәссамлыкка укырга кердем.

1964 нче елны өченче курстан Совет Армиясенә алынып, тулы өч ел гомеремне ил чигендә хезмәт итеп уздырдым. Армиядән соң укуымны дәвам итеп, өченче курсны тәмамлауга, өйләнеп башлы-күзле булдым. Дәүләт имтиханнарына хәзерләнеп йөргәндә кызыбыз Миләүшә дөньяга килде.

Имтиханнарны уңышлы тапшырып, ирекле диплом белән, 1969 нчы елны туган ягыбызга әйләнеп кайттык. Дүрт ел төрле оешмаларда рәссам булып эшләдем. Мин ясаган зур-зур стендлар күп еллар буе шәһәребез урамнарын матурлап, бизәп торды. Иҗади яктан иң истә калган чор - нефть бораулау конторасында эшләгән елларым. Күңел гел Татарстан ягына тартты. 1973 нче елның җәендә Яр Чаллы шәһәренә күченеп килеп, инструментлар заводына грузчик булып эшкә урнаштым. 1996 нчы елның июленә кадәр, гомерем шул заводта узды. Соңгы уналты елымны мастер булып эшләдем. Ике кыз белән бер малай үстердек. Хәзерге көндә ике оныгыбыз бар.

"Аргамак" журналы № 1, 1997.