БЯШИРОВА САФИЯ

Ломат авылында торучы Сафия Бяшированың бәетләрен һәм шигырьләрен без берничә кат инде бастырдык. Аның үзе турында, аның язмышы турында «Татар газета»сында язып чыккан идек (№5, 17.11.97).

Сафия безгә май аенда өч шигырен җибәрде. Беренче шигыре безнең газетабызда шигырьләре еш чыга торган Әминә апа Долотказинага багышланган һәм аның туган көненә бүләк диеп җибәрелгән. Икенче шигыре элек бездә бик күп материалларын бастыручы Шамил Джалимовка багышлаган. 

«Татар газета»

БАГЫШЛАУЛАР

ОЗАК ЯШӘ, ӘМИНӘ АПА!

Әминә апа Долотказинага

Озак яшә! Ходай саулык бирсен.
Бездән сезгә булсын шул теләк.
Сез язганны яратып укып киләм,
Сез бит, Әминә апа, бик кирәк.

Матур итеп язганнарың өчен,
Әминә апам, сезгә рәхмәт!
Бәхетле бул, картаюны белмә,
Дөньясында яшә рәхәт.

Тормыш гөлең синең шиңмәсен,
Чәчәкләрең иртә коймасын.
Йөрәгең яшь булсын һәрвакытта
Картаюны бер дә тоймасын.

Бул бәхетле, кайгыларга бирешмә,
Сакла, Әминә апа, үзеңне.
Ал чәчәкләр бүләк итәр идем,
Белмәдем бит туган көнеңне.

«Татар газетасы»на күп язасың,
Без яратып аны укыйбыз.
Шуның өчен сезгә чын йөрәктән
Саулык, сәләмәтлек телибез.

ШАМИЛ ДЖАЛИМОВКА

Синең рәсемеңне күрәм
Газетаны ачуыма.
Рәхмәт яусын сиңа, Шамиль,
Болай күп язуыңа.

Йөрисең бик күп төшләргә,
Ульянга, Самарага.
Газеталар таратасың
Бу авыр заманада.

«Татар газетасы»н укый
Хәзер бик күп татарлар.
Әбиләр дә, апалар да
Аны бик яраталар.

ИРЕК ДАМИРОВИЧКА

Рәхмәт безнең редакторга,
Тырышадыр, эшлидер.
«Якташлар»да эшли-эшли
Ару-талу белмидер.

«Татар газетасы» безнең
Яшәсен иде балкып.
Адашып калмасын иде
Ярты юлда югалып.

Татар халкы бердәм булып
Саклыек телебезне.
Урыс, мукшы арасында
Югалтмыйк үзебезне.